Mat 21 | NAS | STEP | Tenang Jiisuuꞌ bakaning ninka Jerusalemaꞌ duerueꞌaama Bepasi-namono-koo basiarima Oliveꞌpoꞌnamii-koo otoinooꞌ, Jiisuuꞌke bakaning barevare-nupoong-koo kenaanka uroꞌke botovuretuꞌ aaꞌpurema,

Matthew 21

Jiisuuꞌke Nantoong Asiꞌnooꞌ Nau-antavuruꞌnaꞌ Jerusalemaꞌ

(21:1–25:46)

Jiisuuꞌ Daurarong Deemparara Jerusalemaꞌ Tumparuꞌnaꞌ

(Kena 118:25-27; Mak 11:1-11; Luk 19:28-40; Jon 12:12-19)

1 Tenang Jiisuuꞌ bakaning ninka Jerusalemaꞌ duerueꞌaama Bepasi-namono-koo basiarima Oliveꞌpoꞌnamii-koo otoinooꞌ, Jiisuuꞌke bakaning barevare-nupoong-koo kenaanka uroꞌke botovuretuꞌ aaꞌpurema, 2 “Temono-koo danto uroꞌkanooꞌke otoi-namono-koo duꞌdareai, eeꞌnoko duꞌdareta namuꞌke doonkiiꞌnavoroꞌ moꞌming-koo biꞌari teke otoko oovereeꞌnaang, bauring-navoroꞌ kampia-navoroꞌ nariꞌ. Tevoroꞌ dapaꞌereta ookeng aꞌ ning-anko poꞌantavereai. 3 Niiꞌnung naninge tokoonaꞌ minkurureko nauerema aaꞌpereai, ‘Ovoring piavoing akong,’ eeꞌnoko teie namuꞌke botorureaing aaꞌpuma, ‘Bokuvereri bereai.’”

4 Aung tee kapooꞌ narunge temuꞌnunge nakaronunge tarampeearama~ minkuvuuꞌnung dupearaaꞌnaang teeꞌ nkoaruꞌ, tee Daari Meekung-koo aaꞌpuuꞌnooꞌka minkuvuuꞌnung,

5 “Bera naueriai teing Saioni-nupoong, aaꞌperiaing, ‘Ooveriaing, diikaang daurarong~ diiꞌanko dooroompari banainge pomaang, doonkiiꞌnu ^{▼▼21:5Niiꞌning dauraronanka oosi pankenankai kare-koo datavoromainge nanaamaung nantoonge ankampaariiꞌnaang.} kampianu-koo dau baꞌnanui, kauꞌ karenaumo-nu dooroompari mankiꞌnanka nkavumau-koo.’”
(Aisaiaꞌ 62:11; Sekaraia 9:9)

6 Teketa tenaanka Jiisuuꞌ bakaning-koonaanka barevare-nupoong-naanka bereta teeꞌ nauvuretuꞌnaꞌ nkoaretuꞌ. 7 Tenaankai teu doonkiiꞌnu baurinu ninka poꞌantavuresioꞌ teinge biikaang baarong dau taniꞌauꞌ, eeꞌnoko Jiisuuꞌ baaronanka-koo dau baꞌnamparuꞌ. 8 Teketa nantoong karingai biikaang baaronanka taunge danto taniꞌauꞌ, eeꞌnoko niiꞌninge uurung tovang napuꞌaama taniꞌauꞌ.

9 Eeꞌnoko teing karinga Jiisuuꞌkoo uroꞌkanooꞌke nanauꞌninge eeꞌnoko damaꞌdu-eta porouꞌninge eura bokiaama aaꞌpaakoꞌ, “Biraanke tee-koo Deevitaꞌ bauring! Biraanke-poꞌnung aung Ovoring bakaang miring-koo pomaang! Biraanke otoi otoaing aꞌdeiꞌke paning-koo nariꞌ!” 10 Teketa tenang Jiisuuꞌ Jerusalemaꞌ tumparako ookara nantoong temono-koo-nupoonge irikung-antavarira niaꞌkaama aaꞌpaakoꞌ, “Aung baa?” 11 Eeꞌnoko nantoong karingai makuꞌaama aaꞌpauꞌ, “Aung tee nakaronara Jiisuuꞌ, Nasaretiꞌnung, teꞌ eeꞌnooꞌ Kaaleliꞌkoonooꞌ.”

Jiisuuꞌke Dootuuꞌnava Pankava-koo Baave Nkonuka Bataꞌuruꞌnaꞌ

(Mak 11:15-19; Luk 19:45-48; Jon 2:13-22)

12 Teketa Jiisuuꞌ parang-koo tumparara pava dootuuꞌnava pankava-koong-koo nantoong sipisipiꞌ dovang parekanumpoꞌ baaveveekoꞌning bataꞌuruꞌnung. Aaꞌnoko batanananka mooniꞌ aampariꞌaakoꞌning biikaning eeꞌnoko napoꞌ baꞌnavaꞌnananka kuukuuꞌ baave-aarikoꞌning biikaning teka piakatuꞌuruꞌ. 13 Aaꞌpuruꞌ teing, “Kumponing bakaang kara Daari Meekung-koo tee eeꞌ daariari otong,

‘Nkaang pava tee pava kunsinava tampari otoaing,’
(Aisaiaꞌ 56:7)

teka diiꞌke ‘bakiaaꞌ nkonuka biikanooꞌ’ deeng-antavering.”

(Jeremaia 7:11)

14 Teketa kaputuꞌnanka eeꞌnoko dootananka tee-anko porouꞌ teꞌ dootuuꞌnava pankava-koo, eeꞌnoko teka taare-antavuruꞌ teing. 15 Teka teing piristiꞌnuka-koo pankenge eeꞌnoko boto naunukai teeꞌ ooaara domang orakaꞌ deeꞌorouꞌ teie kapooꞌ tampeng taꞌnimpaariiꞌnanka nkovuko eeꞌnoko napoꞌ toireꞌke dootuuꞌnava pankava-koo parang-koo kuunga oovavaama aaꞌpaakoꞌnung-koo, “Daangampampimaatoaing tee Deevitaꞌ bauring.” 16 Teinge niaꞌaama aaꞌpauꞌ, “Dake ee taaravemaang tee kapooꞌ toireꞌke minkuaamatomaung?” Jiisuuꞌke makuꞌurima aaꞌpuuꞌ, “Eeꞌ. Teka ee diiꞌke tee Daari Meekung-koo deeruerima noruꞌeriaung aaꞌpumanooꞌka,

‘Toireꞌ eeꞌnoko nerakauꞌnuka biikaang beꞌduuꞌketa dake tee dangaraangang tavoꞌantaveaing?’”
(Kena 8:2)

17 Eeꞌnoko teing teka temono-koo sipurira Beetani-navuntuꞌaape tenkenura teke aatuuꞌ.

Tee Koiꞌ Piikiꞌ Maraꞌouꞌnaꞌ Jiisuuꞌke Barakosiꞌuioꞌ

(Mak 11:12-14, 20-24)

18 Teketa daunaꞌmung tero maata Jerusalemaꞌaape napoꞌ bema Jiisuuꞌ tee peeravouꞌ. 19 Teketa piikiꞌnavari taung miiringa oovura teꞌ tevari-anko beuꞌ. Teka sinang tevari-koo oovuaꞌ, paraꞌ narung otoko oovuuꞌ. Teketa aaꞌpuuꞌ tevari, “Daꞌkoo tee napoꞌ sinang biꞌduaukaꞌnung.” Teketa namuꞌke tevari maraꞌoi booꞌparuꞌ.

20 Teketa tenang bakaning barevare-nupoonge tee ooaara teing bakei taꞌninauꞌ eeꞌnoko aaꞌpauꞌ, “Aung avari arekeeꞌ namuꞌke maraꞌoi booꞌparing?” 21 Jiisuuꞌke teing makuꞌurima aaꞌpuruꞌ, “Masikaꞌ naurampimang ninge, diiꞌ masikaꞌanta otoꞌderuri deekoꞌ, keekooꞌdariaꞌ, aung avari-koo nkoaring-pinaꞌ oroꞌ dau basinaꞌ nkoveriaing, aaꞌnoko aunteto iuꞌ diiꞌke aaꞌperiko, ‘Bitaꞌdarara pirung-koo duaꞌdaravai,’ teeꞌ nkoarapeuꞌ. 22 Masikaꞌantaveri niaꞌkiriaing deekoꞌ tee nkaveriaing kapooꞌ eentarariaing diikaang kunsi-koo.”

Jiisuuꞌ Bakaang Purintoꞌkoong Okoraꞌ Niaꞌauꞌnaꞌ

(Mak 11:27-33; Luk 20:1-8)

23 Teketa tee Jiisuuꞌ pava dootuuꞌnava pankava-koong-koo parang-koo kuung tumparuꞌ, eeꞌnoko teke nau-antavarako piristiꞌkoo ovontung eeꞌnoko nantoong urang-antanuka tee-anko porouꞌ. Porora tanaꞌaama aaꞌpauꞌ, “Tee aung aremuriiꞌ tauraꞌ otoko dake aing kapooꞌnanka nkovemaatoing? Eeꞌnoko napoꞌ baie aruuꞌnunge tee tauraꞌ?” 24 Jiisuuꞌke makuꞌurima aaꞌpuruꞌ, “Ninge diiꞌ napoꞌ tanaꞌdampiaing, eeꞌnoko ning makuꞌmeriko ninge naurampiaing tee tauraꞌ ning otoꞌmemuko teing aing kapooꞌnanka nkoamaung okoraꞌnooꞌ. 25 Jooni Minkinara-koo niaꞌdampiiꞌnaang: baie tauraꞌpuioꞌ nantoong ntong-koo minkivurima meekaꞌantavurikoꞌ? Kumponinge, aiꞌ tamung nantoonge?” Teketa teing biiꞌka niaꞌeema aaꞌpeekoꞌ, “Areꞌpampiiꞌnaang? Aaꞌpampiko deekoꞌ, ‘Kumponinge,’ teie aaꞌmuriiꞌnaang, ‘Teka diiꞌke aming-koo Jooni masikaꞌantaveriarukoꞌ?’ 26 Napoꞌ aaꞌpampiko deekoꞌ, ‘Tamung nantoong-etaing,’ nantoonge tamaariꞌneenga, aiꞌ teinge tee ookarai Jooni nakaronara Kumponing-etaing tasiꞌpai otong.” 27 Teketa Jiisuuꞌ makuꞌaama aaꞌpauꞌ, “Niiꞌke aaꞌ noruꞌampiaꞌ.” Teketa Jiisuuꞌke aaꞌpuruꞌ teing, “Eeꞌ, ninge teeꞌke diiꞌ naurampiarooꞌnaang baa tee ning tauraꞌ amuuꞌnung aing kapooꞌnanka nko-koo.”

Tee Mirumiruꞌ Naning-namainta Kemaintara-koong

28 “Aung minkunaa arekeeꞌ pa noruꞌeriiꞌnaang diiꞌke? Naning narung baurinketa kenaanka otokoꞌnung. Tutunaꞌnung bauring-anko bera aaꞌpuuꞌ tee, ‘Eꞌmung daꞌ bera mintoonau-koo mintoontaravai.’ 29 Eeꞌnoko teie makuꞌuma aaꞌpuuꞌ, ‘Ning aaꞌ mearooꞌnaang,’ teka damaꞌke noruꞌ paariarara mintoong-koo nanuuꞌ. 30 Teketa tee bauma napoꞌ niiꞌnung-anko bauring-anko bera teeꞌ nariꞌ minkuvuuꞌ, eeꞌnoko teie aaꞌpuuꞌ, ‘Mera mintoomaraaꞌnaang,’ teka damaꞌke bearuuꞌ mintoong-koo. 31 Temainta-koo arerai beuma bakaang pia siompuuꞌ?” Teinge makuꞌaama aaꞌpauꞌ, “Teie tutunaꞌnunge.” Teketa Jiisuuꞌke aaꞌpuruꞌ teing, “Masikaꞌ naurampimang ninge diiꞌ, teinge taakisi nkanukai eeꞌnoko teing manikuꞌ auning nkonuka teinge tee diiꞌ divuꞌdaari muuꞌ Kumponing bakaang-koo beroaing. 32 Aiꞌ Jooni tee diiꞌanko pora taung koontoꞌnavung naururiko diiꞌke masikaꞌantaveriaruuꞌ, teka teinge taakisi nkanukai eeꞌnoko manikuꞌ auning nkonukai masikaꞌantavaamaung, eeꞌnoko bane bereꞌariko ooverira, diiꞌke tee masikaꞌantaverima bereꞌdariaꞌ otong.”

Kara Dikitoꞌ Teing Nantoong Oreng Mintoong Tanata-koo Sipuruꞌning-koong

(Mak 12:1-12; Luk 20:9-19)

33 “Napoꞌ niiꞌnung mirumiruꞌkoo taarakiriai. Aung aaꞌ tee naning narung ovoring otokoꞌnung bakaang kansiꞌkoo mintoonau uaininau keempura. Eeꞌnoko parampuuꞌ tenau, dinkung nenkeꞌuuꞌ uaini miiꞌdoma tenau-koong. Eeꞌnoko pava tarenava siaruaꞌ kanivuuꞌ. Teketa niiꞌning nantoong tenau tare-antavurira niiꞌnameensiꞌkoo tenkenuuꞌ. 34 Teketa batei sinang kavuꞌkoong dueꞌuko teie bakaning botovotonaaꞌnuka botovuruꞌ teing-anko uaini tarenuka-anko bakaang baarauni~ tenau-koong nkaevaavaꞌnaang. 35 Teketa teinge tenau tarenukai teing bakaning botovotonaaꞌnuka mooꞌaarima daiꞌaaruꞌ, narung murasiavaama niiꞌnung dupisiꞌauꞌ, teketa beenaumo-nung kapange tavaama dupisiꞌauꞌ. 36 Teketa napoꞌ teie ovoringe niiꞌning mmauꞌ botovotonaaꞌnuka napoꞌ teing-anko botovuruꞌ tutunaꞌnamuꞌkoo botovuruꞌning-koo dau basining, teketa teinge tenau tare-antavuruꞌninge teeꞌ nariꞌ tutunaꞌning nkoaaruꞌnaꞌ nkoaaruꞌ. 37 Asiꞌnaꞌmoo masikaꞌmoo teie bauring botovuuꞌ teing tarenuka-anko, eeꞌ noruꞌura, teing tee nnuring-koo amaiaaꞌoroaing. 38 Teka teing tare nkonukai tee bauring ooaara teinge biiꞌka kareaama aaꞌpaakoꞌ, ‘Tee aung eeꞌnung barenku okovuaing. Aiaꞌ dupisiꞌampiaing tee, barenku okomuriainaꞌ.’ 39 Teketa teinge kompaara tee uaininau-eta damaꞌdu duaꞌaara teka dupisiꞌauꞌ tee. 40 Eeꞌnoko tenau okonarai pora teing tenau tarenuka arekeeꞌ nkovuriaing?” 41 Teinge aaꞌpauꞌ, “Teie aaꞌ teing maarekusiꞌnuka bakei maremaarenooꞌ basi-antavuri dupisiꞌuriaing, eeꞌnoko tee tenau teie niiꞌning napoꞌ tare-antavuriaing baarauni~ tenau-koong avaamatoaining sinang kavaama.” 42 Teketa Jiisuuꞌke aaꞌpuruꞌ teing, “Diiꞌke ee tee Daari Meekung-koong kara deeruerima damaꞌ nkoaravainaꞌ tasiꞌperiaung aaꞌpui otoinooꞌka,

‘Tereꞌ eeꞌnareꞌ kapanareꞌ pava kaninukai pooreꞌaama duaꞌauꞌnareꞌ ookutunava-koo eꞌmanianareꞌ tumanareꞌ deemparioꞌ tasiꞌpauꞌ damaꞌke. Ovoringe teeꞌ eeꞌnaꞌ nko-antavuuꞌ eeꞌnoko bakei taꞌnimpaariiꞌ niikaang duta-koo.’
(Kena 118:22-23)

43 Teeꞌkoo ninge naurampimang, tee muuꞌ Kumponing bakaang tee diiꞌ pariꞌduriaing bera teing nantoong sinang tampara tavoꞌantavaavaining avuriai. 44 Eeꞌnoko ookara nantoong tereꞌkoo tasiꞌpaavaꞌ tupampariaining tee biiꞌka pisiraꞌariaing, bera baa tee naning tereꞌ dau duaꞌaravaing tee tereꞌke puutuvuaing.” 45 Teketa tenang teinge piristiꞌkoo ovontunge eeꞌnoko Boto Keperuuꞌnavitue Jiisuuꞌ bakaang kara mirumiruꞌ taaravaara tee teing tasiꞌpariruꞌ teing eeꞌning minkuvuruꞌnung Jiisuuꞌke. 46 Teka tee daiꞌaavaꞌnaang taung besiꞌaama nantoong karinga-koo avoreaakoꞌ, nantoonge tee eeꞌnung nakaronung noruꞌai otoinooꞌkoo.